多得Facebook嘅回顧功能，提醒咗我當年今日係去緊日本旅行之餘，更同時發現雖然跟身邊舊同事朋友相比，自己唔算去得多旅行或出trip，但若以出意外嘅比率嚟計，我應該係有資格做遠遊地獄黑仔王。
究竟有幾黑仔？不如睇吓以下5個自己印象比較深刻嘅事件。
1. 2018年，日本。首站箱根，然後富士山河口湖加精進湖，最後返東京。由箱根去富士山當日早上，收到通知前往御殿場條路因前一晚暴雨山泥傾瀉，原定坐嘅車取消晒，乜火車巴士甚至的士都冇，仲記得當日朝早仲落住毛毛細雨。
Fine，咁咪兜大啲路，轉坐JR過去囉。好嘢，坐JR坐到一半撞正「人身事故」，結果坐喺車上等咗唔記得幾耐，人到河口湖時天都差不多全黑，最後要坐人生喺日本最貴嘅一程的士入去精進湖。
2. 2016年，英國。歐遊途中老豆即興想去倫敦，然後我同佢擺低大行李連同電腦，放喺住巴黎嘅親戚屋企，自己拎啲輕便行裝就坐eurostar去倫敦。原定行程最後一日早上由倫敦坐eurostar返巴黎，然後夜晚坐飛機返香港。
殊不知人到火車站準備離開時，仆街，因意外故障，全條eurostar停駛，當日職員話最快都要第二三日先整好。
唔緊要，咁咪即刻打去保險公司，問有冇得買過張機票由倫敦直接飛返香港啫。記得老豆最後選擇即日飛返香港，而我就索性stay hehind順便搵朋友。
3. 2014年，日本。當時新聞聲稱百年難得一遇暴風雪，又俾我遇到。仲記得頭兩日人在輕井澤，剩係覺得凍咗啲，雪多咗啲，但唔知原來大雪到咁。
最恐怖係之後坐火車去東京。後來至知道，如果坐遲一班車，根本係連東京都去唔到，因為後來火車直頭停駛埋。
人到東京後，本來住間hostel話因暴風雪影響，啲熱水爐壞晒用唔到，結果體驗埋人生第一次天寒地凍下，去公眾澡堂沖涼。
4.2013年，又係日本。不過呢次係京都同大阪。人生第一次去日本，仲貪得意租單車，自己喺京都市踩，點知踩到後期突然橫風橫雨，同當時識嘅台灣朋友一齊好狼狽，全身濕透咁返hostel。打開新聞睇至知，原來遇正颱風萬宣。第二日仲因為個颱風，導致所有火車取消，爭啲返唔切名古屋。好彩最後冇事。
但要數最經典嘅一年，2012年肯定排首位，沒有之一。
5. 2012年，波蘭。原定最後一日應該係下午坐長途巴士，由克拉科夫（Krakow）返德國。當日早上將行李鎖咗喺巴士站旁嘅Locker，諗住喺附近兜圈食飯後就拎返行李走。當時用嘅Locker仲係好舊式，即係入錢拎走兼自己袋好條鎖匙，唔係電子款。
點知臨開車前約45分鐘，諗住返去開Locker準備拎行李走時，先發現大，檸，樂。
條匙唔見咗。
真係左搵右搵，全身上下內外套任何一個袋口位甚至到底褲，去到成個背囊都唔見。
我心諗，算啦，咁咪打俾開鎖佬囉，點知開鎖佬好堅持，點都要黃昏5點過到嚟開。而當日坐嗰班長途巴士係下午3:30開出，一日得一班。
問埋可唔可以之後寄行李返德國同其他方法，結果開鎖費加寄行李費實在貴到仆街，兼要成個月先寄到返去，所以都係算數（而我當時坐程長途巴士，係€19咋佢老味）。好彩最後巴士嗰邊成功免費改日子，最多book多一晚平平hostel，慢慢等開鎖佬嚟解救都得。
anyway，book一晚平平hostel瞓，都係平過佢寄開鎖加寄行李費呀！！！！！
當然2012年再神奇嘅經歷都試過，例如倫敦返慕尼黑就因大霧而轉咗去另一個機場降落，仲有喺巴黎白教堂樓梯爭啲俾個黑人明搶手袋，仲有喺北京回程返港遇正百年一遇大雨…….而家睇返，啲咩班次delay取消，仲有miss咗班飛機，其實都好小事。
講咗咁耐，其實都係想打返一句：好掛住有得去旅行嘅日子呀，嗚。
初稿發表於 2022 年 Instagram，2026 年重新整理刊載。
