今次係「帶住家人去歐遊2.0」，不過組合就變成老豆大家姐細妹我四個。本來抱住冇假放心態旅行，還好中間仲有好多事值得紀錄加笑吓：
1）老豆罕有地mean人。本身佢係個有大肚腩嘅中佬，前日喺柏林食完午飯後，家姐趁等過馬路時，問老豆食得飽唔飽，老豆望兩望附近，好隨意地講句「問吓你隔離嗰個先啦。」重點係隔離嗰個，係一個目測有300磅體重，肚腩之大係老豆嘅兩倍嘅德國佬（好似係）。
2）要形容今個trip聽得最多嘅關鍵字，肯定係 #炸咗 。老豆係個歷史迷，由愛丁堡到柏林至德累斯頓，老豆最關心嘅並唔係啲建築物有幾靚風景有幾怡人，而係有幾多冇喺二戰被炸毀。「呢度keep得好呀，咁都冇被人炸到，係黑到立立令囉」、「你知唔知點解柏林啲樓咁多咁新呀，因為喺二戰嗰陣被人炸得七七八八呀。」
3）如果話我老豆係天生嘅model，求其影幾張snapshot都好睇，咁家姐肯定係相機嘅勊星。影親佢啲樣，仲醜過蘋果照妖鏡底下嘅女星，到底家姐同相機（或者係隨行攝影師）前世有咩冤孽，我都好想知。
4）Where is my father？要喺旅行期間搵我老豆，有兩招萬試萬靈大法，一係搵附近嘅櫈（係，佢同上年比，真係冇咁行得，雖然佢仲係比我地三個更chur得），二係搵附近男廁，所以我地從來冇擔心過會同老豆失散。
5）我和德文班同學有緣。唔計之前已約好喺柏林見面嘅 Winsome Fu，喺大英博物館都可以撞到 Darlie Yiu，夾都冇夾過，喺香港都未試過咁有緣。
6）成日話出門靠朋友，多得Serena Pun同埋Raymond Hung，唔介意山長水遠去遊樂場on99玩，仲有得煮頹麵食睇youtube，令今次本來中間應該好悶嘅trip生色不少。
7）今次經歷晒四季天氣，由最熱34度，熱到接近中暑，到最凍接近10度都試過，咁都冇病到真係還神，最多係曬黑好多啫。（touchwood）
8）第一次咁討厭喺外國搭地鐵，有一刻我覺得自己係一隻喺焗爐內等被烤熟嘅燒豬，唔怪得睇報紙連本地人都好不滿地鐵冇冷氣，仲話搞到粧都溶晒。（笑）
9）從來冇預計過Pink Floyd展覽會好！睇！得！咁！緊！要！之前只係有聽佢地最出名嗰幾隻大碟，但一直唔知佢地嘅歷史同埋大碟製作花絮。只能話佢地實在太厲害了，好多概念行得好前衛，展覽最尾係播佢地2005年「Comfortably Numb」嘅live，睇到眼濕濕，極度值得睇。
10）終於去到柏林East Side Gallery，好開心。
11）其實我好掛住五年前喺德國時成日食嘅0.6歐雪糕，但今次淨係喺德累斯頓食過1.2歐嘅雪糕，仲要冇之前食嘅咁好食，反而喺愛丁堡食香港已冇得賣嘅V字頭雪糕仲好味。
初稿發表於 2017 年 Facebook，2026 年重新整理刊載。
