太耐冇寫過嘢，突然手痕想寫寫有關近日嘅一啲諗法，因為呢個反思同情緒實在好強烈，好想好好地記錄。
過去呢三年半做「遊走香港屋邨誌」，由一個on99只係因為當時返正職同疫情太苦悶，於是試做當玩吓自娛嘅side project，變成今日自己生命入面不可或缺嘅部分，其實中間學習同認識了解到最多嘅，唔係屋邨，而係自己。
中間過程雖則五味雜陳，但同時好好地重新認識了解自己，清楚我係邊個，同埋我到底想點，真實內心諗法係咩。
自從上年出書，到年尾開始擺市集，仲有推出卡牌，仲好驚喜地本書有獎攞，開始有人支持肯定之後，本質上的確係開心事嚟，更加係我以前從來冇諗過會去到嘅高度嚟，嗰陣好似就係打機不斷地成就解鎖咁，好爽，好有滿足感。
但我亦因為咁，慢慢誤會自己嘅身份。
我以為自己係一個需要承接期待、要對得住所有支持嘅角色。支持本來係推動力，但後來不知不覺間就變成壓力。
我變得好在意人哋點睇我、會唔會失望，甚至好怕自己做得唔夠好、唔夠完美。
有一段時間，我將自己推到去一個相當危險嘅位置——好似變成24/7秒回嘅人，每一個回應都係為令大家覺得開心，為唔好令人覺得難受，為所謂禮貌上等等原因而忽略自己。
2025年係好難受，尤其下半年嘅情緒低潮，其實有一半原因，都係嚟自呢種內耗。
但其實，我只係一個做記錄嘅普通人，係血肉之軀。
創作同記錄過程一定會有瑕疵、有不足，甚至有情緒同錯失。而且更重要嘅係：完成，往往比完美重要。
寫咁長篇大論，正正就係想重新提醒自己，當初行屋邨、寫記錄，只係因為自己鍾意，唔想事隔多年後後悔，想好好記低香港公屋曾經存在過嘅樣貌同故事。至於產品、市集、卡牌，都只係一種方法同手段，希望俾更多人認識同知道香港公屋，或係因為咁而對公屋有興趣，但呢個唔係我嘅身份。
我唔需要成為任何人心目中「應該要係點」嘅模樣，亦唔需要為其他人嘅諗法、反應或情緒背負責任；真正要做嘅，應該係我點向自己交代，誠實面對自己感受同諗法。
重新認識自己、知道自己真正需要為乜負責，只能話係一件雖則好攰好痛苦，但極其重要嘅事。
最後，多謝咁多位尤其上年陪伴自己經歷過高山低谷嘅咁多位。
送上一張上年中秋夜影低，自己好鍾意嘅一張相。
初稿發表於 2026 年 Instagram，2026 年重新整理刊載。
